อาทิตย์. ก.พ. 23rd, 2020

ABClao

ຂ່າວສານເພື່ອສັງຄົມ

ຈັບຜູ້ກໍ່ເຫດຄາດຕະກໍາ 2 ຄົນຢູ່ເສັ້ນທາງ 450 ປີ

ພາຍຫຼັງໄດ້ຮັບຂໍ້ມູນຈາກແຫຼ່ງຂ່າວ ໃນວັນທີ 22 ມັງກອນ 2020 ວ່າມີເຫດການຍິງກັນເສຍຊີວິດຈໍານວນ 2 ຄົນຢູ່ບ້ານ ນາຄວາຍໃຕ້ ເມືອງໄຊເສດຖາ ນະຄອນຫຼວງວຽງຈັນ ຈາກນັ້ນ ເຈົ້າໜ້າທີ່ ປກສ ນະຄອນຫຼວງວຽງຈັນ ໄດ້ສົມທົບກັບພາກສ່ວນກ່ຽວຂ້ອງ ລົງກວດກາສະຖານທີ່ເກີດເຫດ ພົບເຫັນລົດເກັງຍີ່ຫໍ້ ເອັກເຊັນສີປອນ ເລກທະບຽນ ກດ 7437 ກໍາແພງນະຄອນ ຈອດຢູ່ແຄມປ່າ ບ້ານນາຄວາຍໃຕ້ ປະຕູແວ່ນລົດເບື້ອງຄົນຂັບ ມີຮອຍຖືກລູກປືນຍິງ ແລ້ວເຫັນກະສອບປືນຕົກເຮ່ຍຢູ່ບໍລິເວນລົດຈໍານວນ 12 ກະສອບ ແລະ ພົບເຫັນຜູ້ເສຍຊີວິດຈໍານວນ 2 ຄົນຊາບຊື່ຄື: ທ້າວ ພິດສະນິກອນ (ຈີມມີ້) ແລະ ທ້າວ ສອນສຸລິຍາ (ຫອຍ) ເຈົ້າໜ້າທີ່ຈື່ງ ເລັ່ງເກັບກໍາຂໍ້ມູນ, ຫຼັກຖານຕ່າງໆ ເພື່ອຊອກຫາຜູ້ລົງມືກໍ່ຄະດີຫຼັງເກີດເຫດ ໄດ້ 9 ມື້ຄືວັນທີ 30 ມັງກອນ 2020 ກໍ່ສາມາດກັກຕົວຜູ້ລົງມືກໍ່ເຫດໄດ້ຄື: ທ້າວ ບຸນຍະເດດ (ຈີວ) ອາຊີບກໍາມະກອນ ຢູ່ບ້ານດົງໂພສີ ເມືອງຫາດຊາຍຟອງ ນວ ມາດໍາເນີນຄະດີ.


ພັທ ສຸລິວັນ ລາດສະວົງ ຫົວໜ້າຫ້ອງຕໍາຫຼວດ ປກສ ນວ ໄດ້ເປີດເຜີຍຕໍໍ່ນັກຂ່າວ ປກສ ນວ ໃນວັນທີ 04 ກຸມພາ 2020 ວ່າ: ຜ່ານການສືບສວນ-ສອບສວນຂອງເຈົ້າໜ້າທີ່ ທ້າວ ບຸນຍະເດດ (ຈີວ) ສາລະພາບວ່າ: ໄດ້ຮູ້ຈັກກັບ ທ້າວ ພິດສະນິກອນ (ຈີມມີ້ ຜູ້ເສຍຊີວິດ) ຍ້ອນຕິດຕາມຜູ້ກ່ຽວທາງເຟສບຸກເພາະເປັນຄົນມັກຫຼີ້ນປືນ ສ່ວນຕົນເອງກໍເປັນຄົນມັກຫຼີ້ນປືນເຊັ່ນດຽວກັັນ ພໍມາໄລຍະໜື່ງໄດ້ພົບກັນໂດຍບັງເອີນຢູ່ຮ້ານອາຫານແຫ່ງໜື່ງ ແລະ ໄດ້ທັກທາຍລົມກັນກ່ຽວກັບເລື່ອງປືນ. ຈາກນັ້ນ ກໍໄດ້ຕິດຕໍ່ພົວພັນກັນໄດ້ປະມານ 6 ເດືອນ ທ້າວ ພິດສະນິກອນ (ຈີມມີ້ ຜູ້ເສຍຊີວິດ ) ໄດ້ຕິດຕໍ່ຊື້ລູກປືນນໍາຕົນເອງປະມານ 3 ຄັ້ງ, ຄັ້ງລະ 20-30 ລູກໃນລາຄາລູກລະ 15.000 ກີບ. ນອກຈາກນີ້, ຜູ້ກ່ຽວຍັງໄດ້ຊື້ປືນສັ້ນນໍາຕົນເອງຈໍານວນ 3 ກະບອກຄື: ປືນສັ້ນຊະນິດ ເບເລັດຕາ ລາຄາ 30 ພັນບາດ, ປືນສັ້ນຊະນິດຈຸດ 32 ລາຄາ 20 ພັນບາດ (ສະກຸນເງີນໄທ) ແລະ ປືນໄທປະດິດຂະໜາດ 380 ເຊມີໂອໂຕ ລາຄາ 25 ພັນບາດ ແຕ່ປືນກະບອກສຸດທ້າຍຜູ້ກ່ຽວບໍ່ໄດ້ຈ່າຍເງິນໃຫ້ກັບຕົນ ມາໄດ້ໄລຍະໜື່ງຕົນເອງຈື່ງທວງໜີ້ຄ່າປືນແຕ່ຜູ້ກ່ຽວໄດ້ຕົວະວ່າມື້ນັ້ນມື້ນີ້; ພ້ອມທັງເວົ້າຂົ່ມຂູ່ວ່າຈະຂ້າຕົນເອງ ຈຶ່ງເຮັດໃຫ້ມີແນວຄິດຄຽດແຄ້ນຢາກຂ້າຜູ້ກ່ຽວຫຼາຍຄັ້ງ, ແຕ່ບໍ່ມີໂອກາດທີ່ເໝາະສົມ.

ຕົກມາຮອດວັນທີ 21 ມັງກອນ 2020 ທ້າວ ພິດສະນິກອນ (ຈີມມີ້ ຜູ້ເສຍຊີວິດ) ໄດ້ໂທຫາຕົນເອງຫຼາຍຄັ້ງ ເພື່ອນັດໃຫ້ໄປຫາຢູ່ເຮືອນຂອງຜູ້ກ່ຽວຈຸ ດປະສົງແມ່ນຜູ້ກ່ຽວຢາກໄດ້ປືນນໍາແຕ່ຕົນບໍ່ໄດ້ໄປຫາ. ດັ່ງນັ້ນ, ຈຶ່ງໄດ້ຕົວະວ່າມີປືນທີ່ຜູ້ກ່ຽວຕ້ອງການ; ພ້ອມທັງນັດຜູ້ກ່ຽວອອກມາຫາຢູ່ສາມແຍກ ບ້ານຊຽງດາ ຮອດເວລາປະມາ 17:00 ໂມງຕົນເອງກໍ່ໄດ້ຂີ່ລົດອອກໄປຈຸດນັດພົບ ແລ້ວເຫັນຜູ້ກ່ຽວພ້ອມໝູ່ອີກຄົນໜື່ງ ແລະ ໄດ້ບອກໃຫ້ພວກກ່ຽວຂີ່ລົດນໍາມາປ່າເຂດບ້ານນາຄວາຍໃຕ້ ພໍໄປຮອດຈຸດ ທ້າວ ພິດສະນິກອນ (ຈີມມີ້ ຜູ້ເສຍຊີວິດ) ໄດ້ລົງລົດເອົາເງິນມາໃຫ້ຕົນເອງຈື່ງບອກໃຫ້ຖ້າຢູ່ຈຸດເກີດເຫດກ່ອນ ເພາະຈະໄປເອົາເຄື່ອງມາໃຫ້. ຈາກນັ້ນ ກໍ່ຂີ່ລົດອອກໄປເພື່ອທ່ວງເວລາໄດ້ປະມານ 4-5 ນາທີ ກໍ່ກັບເຂົ້າມາແລ້ວຈອດລົດຍ່າງລົງໄປດ້ານຫຼັງ ເພື່ອຈົກເອົາປືນຢູ່ຫົວໂສ້ງມາຍິງໃສ່ ທ້າວ ພິດສະນິກອນ (ຈີມມີ້ ຜູ້ເສຍຊີວິດ) ທີ່ກໍາລັງໄຂປະຕູພວມຈະລົງລົດ 2 ນັດ ເຮັດໃຫ້ຜູ້ກ່ຽວລົ້ມລົງ. ຫຼັງຈາກນັ້ນ ຈື່ງໄດ້ຍິງ ທ້າວ ສອນສຸລິຍາ (ຫອຍ) ຈໍານວນ 10 ນັດ.

ຫຼັງຈາກຄາດຕະກໍາສໍາເລັດຕົນເອງກໍໄດ້ນໍາເຄື່ອງທີ່ຕົນເອງໃສ່ໄປຈູດຢູ່ເຂດບ້ານດົງໂພສີ ແລະ ໄດ້ໃຫ້ນ້ອງຊາຍໄປສົ່ງຢູ່ຄີວລົດເມສາຍໃຕ້ ເພື່ອເອົາຕົວລົບໜີໄປຢູ່ແຂວງຈໍາປາສັກ. ພໍມາຮອດວັນທີ 30 ມັງກອນ 2020 ຕົນເອງຈື່ງໄດ້ກັບມາ ນະຄອນຫຼວງວຽງຈັນ ຈຶ່ງຖືກເຈົ້າໜ້າທີ່ເຂົ້າກັກຕົວ.
ປັດຈຸບັນ ຄະດີດັ່ງກ່າວ ເຈົ້າໜ້າທີ່ໄດ້ຂໍຄໍາສັ່ງກັກຂັງພາງ ເພື່ອດໍາເນີນຄະດີຕາມຂັ້ນຕອນຂອງກົດໝາຍ.

ພາບ-ຂ່າວ: ປກສ ນວ