อาทิตย์. ก.พ. 23rd, 2020

ABClao

ຂ່າວສານເພື່ອສັງຄົມ

ຫາດຊາຍຟອງທຳລາຍຕົ້ນກັນຊາຢູ່ບ້ານຄວາຍແດງໄດ້ 300 ກ່ວາຕົ້ນ

ໃນວັນທີ 31 ມັງກອນ 2020, ກອງບັນຊາການ ປກສ ເມືອງຫາດຊາຍຟອງ ໄດ້ສົມທົບກັບ ພະແນກກວດກາ ແລະ ຄວບຄຸມຢາເສບຕິດ ຫ້ອງຕຳຫຼວດ ກອງບັນຊາການ ປ້ອງກັນຄວາມສະຫງົບ ນະຄອນຫຼວງວຽງຈັນ ແລະ ການຈັດຕັ້ງບ້ານຄວາຍແດງ ລົງຮື້ຖອນທຳລາຍຕົ້ນກັນຊາ ພາຍໃນເຂດບ້ານຄວາຍແດງ ເມືອງຫາດຊາຍຟອງ ນະຄອນຫຼວງວຽງຈັນ ຢູ່ 2 ຈຸດລວມມີ 3 ຮ້ອຍກວ່າຕົ້ນ.


ພັທ ວຽງທອງ ຜາງພິລາວົງ ຮອງຫົວໜ້າກອງບັນຊາການ ປກສ ເມືອງຫາດຊາຍຟອງ ນະຄອນຫຼວງວຽງຈັນ ໃຫ້ຮູ້ວ່າ: ພາຍຫຼັງສືບຮູ້ວ່າມີການລັກລອບປູກຕົ້ນກັນຊາ ຢູ່ເຂດບ້ານຄວາຍແດງ ເມືອງຫາດຊາຍຟອງ ນະຄອນຫຼວງວຽງຈັນ ຈຶ່ງໄດ້ແຕ່ງຕັ້ງໜ່ວຍງານວິຊາສະເພາະ ລົງກວດກາສະຖານທີ່ດັ່ງກ່າວ ເຫັນວ່າມີມູນຄວາມຈິງ. ຈາກນັ້ນ, ເຈົ້າໜ້າທີ່ ປກສ ເມືອງຫາດຊາຍຟອງ ໄດ້ນຳກຳລັງລົງສົມທົບກັບພາກສ່ວນທີ່ກ່ຽວຂ້ອງ ແລະ ການຈັດຕັ້ງບ້ານຄວາຍແດງ ເຂົ້າຮື້ຖອນທຳລາຍຕົ້ນກັນຊາ ທີ່ປູກຢູ່ລຽບຕາມແຄມປ່າ, ແຄມຕາຝັ່ງແມ່ນ້ຳຂອງ ແລະ ປູກປະປົ່ນໃສ່ກັບສວນພຶດຜັກຢູ່ 2 ຈຸດ ໄດ້ທັງໝົດ 3 ຮ້ອຍກວ່າຕົ້ນ, ຫຼັງຈາກຮື້ຖອນມາແລ້ວໄດ້ນຳຈູດທຳລາຍ ຢູ່ກາງເດີນຫ້ອງການບ້ານຄວາຍແດງ; ການລົງທຳລາຍຕົ້ນກັນຊາໃນຄັ້ງນີ້ ແມ່ນເພື່ອສະກັດກັ້ນການແຜ່ຂະຫຍາຍຂອງຢາເສບຕິດ ທີ່ຈະເຂົ້າມາໃນສັງຄົມລາວ ແລະ ເພື່ອເຮັດໃຫ້ໄວໜຸ່ມໄດ້ຫ່າງໄກຈາກສິ່ງເສບຕິດ ເຮັດໃຫ້ສັງຄົມມີຄວາມສະຫງົບ ປອດໄພດີຂື້ນເທື່ອລະກ້າວ.


ພ້ອມນີ້, ທ່ານໄດ້ຮຽກຮ້ອງມາຍັງ ພໍ່-ແມ່ປະຊາຊົນໃຫ້ຢຸດເຊົາປູກຕົ້ນກັນຊາ ແລະ ມີໄວ້ຄອບຄອງເພາະເປັນສິ່ງທີ່ຜິດຕໍ່ລະບຽບກົດໝາຍ ກໍ່ຄືກົດໝາຍອາຍາ ມາດຕາ 146(ໃໝ່) ຂໍ້ 3 ບຸກຄົນໃດປູກກັນຊາຈຳນວນແຕ່ 3 ກິໂລກຼາມ ຫາ 10 ກິໂລກຼາມ ຈະຖຶກລົງໂທດຕັດອິດສະລະພາບ ແຕ່ 3 ເດືອນ – 1 ປີ ແລະ ຈະຖືກປັບໃໝ ແຕ່ 500.000 ຫາ 5.000.000 ກີບ; ຖ້າເກີນ 10 ກິໂລກຼາມຂື້ນໄປ ຈະຖືກລົງໂທດຕັດອິດສະລະພາບ ແຕ່ 1 ປີ ຫາ 3 ປີ ແລະ ຈະຖືກປັບໃໝ ແຕ່ 5.000.000 ຫາ 20.000.000ກີບ.

ຂ່າວ: ປກສ ນວ