อาทิตย์. ก.พ. 23rd, 2020

ABClao

ຂ່າວສານເພື່ອສັງຄົມ

ນັກວິໄຈຈີນພົບ ໄວຣັດໂຄວິດ-19 ຍັງມີຊີວິດໃນອາໂຈມຂອງຄົນເຈັບ

ສຳນັກຂ່າວຊິນຫົວ ລາຍງານຈາກເມື່ອວັນທີ 13 ກຸມພາ 2020 ວ່າ ນັກວິໄຈຊາວຈີນ 2 ກຸ່ມ ນຳໂດຍນັກວິທະຍາສາດຊັ້ນນຳຂອງປະເທດ ເປີດເຜີຍການຄັດແຍກສາຍພັນໄວຣັດໂຄໂຣນາສາຍພັນໃຫ່ມ (ໂຄວິດ-19) ຈາກຕົວຢ່າງອາໂຈມຂອງຜູ້ຕິດເຊື້ອ ຄະນະນັກວິໄຈຈາກອົງກອນຕ່າງໆຂອງຈີນ ລວມເຖິງຫ້ອງປະຕິບັດການພະຍາດລະບາດລະບົບທາງເດີນຫາຍໃຈແຫ່ງລັດ ສັງກັດມະຫາວິທະຍາໄລແພດສາດກວ່າງໂຈວ ສາມາດຄັດແຍກສາຍພັນໄວຣັດຈາກຕົວຢ່າງອາໂຈມຂອງຜູ້ຕິດເຊື້ອ


ດຣ. ເຈົ້າຈິນ ຊະວິນ ປະຈຳຫ້ອງປະຕິບັດການ ແລະສະມາຊິກກຸ່ມວິໄຈຂອງຈົງຫນານຊານ ຜູ້ຊ່ຽວຊານພະຍາດລະບົບທາງເດີນຫາຍໃຈຂອງຈີນ ກ່າວວ່າຕົວຢ່າງອາໂຈມມາຈາກໂຮງຫມໍແຫ່ງທີ່ 5 ໃນເຄືອມະຫາວິທະຍາໄລຊຸນຢັຕເຊັນ

ຂະນະທີ່ທ່ານອູ໋ຫນານຜິງ ຮອງຜູ້ອຳນວຍການຫ້ອງປະຕິບັດການວິໄຈ ແລະຮັກສາພະຍາດຕິດຕໍ່ແຫ່ງລັດ ກ່າວວ່ານັກວິໄຈອີກກຸ່ມ ນຳໂດຍທ່ານຫລີ່ ຫລານຈຽນ ກໍ່ສາມາດຄັດແຍກສາຍພັນໄວຣັດຈາກ 5 ຕົວຢ່າງອາໂຈມຂອງຜູ້ຕິດເຊື້ອເຊັ່ນກັນ


ເຮົາຄົ້ນພົບໃນຫ້ອງປະຕິບັດການ ຊື່ງຍັງຕ້ອງມີການຢືນຢັນຈາກນັກລະບາດວິທະຍາ ລວມເຖິງຕ້ອງມີການວິໄຈທາງວິທະຍາສາດອີກ ເພື່ອພິສູດລະດັບຄວາມສາມາດໃນການຕິດເຊື້ອ ທ່ານອູ໋ກ່າວ

ນອກຈາກນັ້ນຕ້ອງຫາຄຳຕອບວ່າໄວຣັດໃນອາໂຈມຖືກກືນກິນໂດຍຄົນເຈັບຫລືມາຈາກການແບ່ງໂຕຂອງເຊລໃນລຳໄສ້ລວມເຖິງຄວາມເຊື່ອມໂຍງກັບເລືອດ ເສມຫະ ການເກີດ ແລະພັດທະນາການຂອງພະຍາດ


ອີກຢ່າງດຣ. ເຈົ້າ ກ່າວວ່າການຄົ້ນພົບຄັ້ງນີ້ຢືນຢັນວ່າອາໂຈມຂອງຄົນເຈັບມີໄວຣັດທີ່ຍັງມີຊີວິດປະກອບຢູ່ ແຕ່ຍັງຂາດຫລັກຖານທີ່ພຽງພໍຕໍ່ການບົ່ງບອກວ່າມີການແຜ່ກະຈາຍຜ່ານອາໂຈມ-ປາກ (fecal-oral transmission)