อาทิตย์. ก.พ. 23rd, 2020

ABClao

ຂ່າວສານເພື່ອສັງຄົມ

ບໍ່ກັງວົນໂຄວິດ-19 ຕະຫລາດອິນໂດເນເຊຍຍັງຂາຍຊີ້ນໂຕເຈຍ

ສຳນັກຂ່າວຕ່າງປະເທດລາຍງານເມື່ອວັນທີ່ 12 ກຸມພາ 2020 ວ່າ ຊີ້ນໂຕເຈຍຍັງເປັນທີ່ນິຍົມໃນຫລາຍພື້ນທີ່ຂອງອິນໂດເນເຊຍ ແມ່ນວ່າຈະມີຄຳເຕືອນຈາກການວິໄຈວ່າ ໂຕເຈຍເປັນສິ່ງທີ່ມີຊີວິດທີ່ໄວຣັດໂຄໂຣນາສາຍພັນໃຫ່ມ ຫລືໂຄວິດ-19 ສາມາດອາໄສຢູ່ ແລະຖືກສົ່ງຜ່ານໄປສູ່ມະນຸດໄດ້ ຄວາມຕ້ອງການຊີ້ນໂຕເຈຍຍັງມີຕໍ່ເນື່ອງ ແລະມີຂາຍຫລາຍເປັນພິເສດໃນແຂວງສຸລາເວສີເຫນືອ


ກຸ່ມຊາດພັນມີນາຊາຊັນໃນນະຄອນສຸລາເວສີເຫນືອມັກນຳໂຕເຈຍທັງໂຕມາເຮັດອາຫານເຊັ່ນ ປານີກີ ທີ່ມີສ່ວນປະກອບຊີ້ນໂຕເຈຍ ແລະແກງຄ້າຍແກງກະຫລີ່, ທ່ານສະເຕນລີ ທິມບູເລງ ພໍ່ຄ້າໂຕເຈຍຈາກເມືອງໂທໂມຮອນບອກກັບ ນັກຂ່າວຣອຍເຕີວ່າ ການຂາຍຊີ້ນໂຕເຈຍບໍ່ໄດ້ຮັບຜົນກະທົບຈາກໄວຣັດໂຄວິດ-19 ແລະຜູ້ຄົນແຫ່ຊື້ກັນຫລາຍຈົນຂາຍຫມົດ ຈາກປົກກະຕິຂາຍວັນລະ 50-60 ໂຕ ແຕ່ລະຫວ່າງຊ່ວງເທດສະກາະສາມາດຂາຍໄດ້ຫລາຍເຖິງວັນລະ 600 ໂຕ


ວິລລຽມ ວົງໂຊ ຜູ້ຊ່ຽວຊານການປຸງອາຫານ ແລະຜູ້ຂຽນຫນັງສືປຸງອາຫານອິນໂດເນເຊຍ ກ່າວວ່າໂຕເຈຍເປັນໂປຣຕີນພື້ນເມືອງທີ່ໄດ້ຮັບຄວາມນິຍົມ ພໍ່ຄົວຈະເອົາຕ່ອມອອກຈາກຂີ້ແຫ້ ແລະຄໍຂອງໂຕເຈຍເພື່ອກຳຈັດກິ່ນບໍ່ດີອອກໄປ ໂຕເຈຍທີ່ກຽມແລ້ວຈະຖືກນຳມາຢ້າງຫລືເຜົາເພື່ອກຳຈັດເສັ້ນຂົນອອກໄປ ຈາກນັ້ນ ໂຕເຈຍທັງໂຕລວມເຖິງຫົວ ແລະປີກຈະຖືກສັບ ແລະປຸງໃນແກງທີ່ມີສະຫມຸນໄພ ເຄື່ອງເທດ ແລະກະທິ ເບີ່ງຄືແກງກະຫລີ່ ຂະນະທີ່ຮ້ານອາຫານພື້ນບ້ານສຸລາເວສີເຫນືອໃນນະຄອນຈາກາຕາ ເມືອງຫລວງຂອງອິນໂດເນເຊຍ ໄດ້ເອົາເມນູໂຕເຈຍອອກໄປ ແຕ່ຊາວສຸລາເວສີເຫນືອຍັງກິນໂຕເຈຍຕໍ່ໄປ


ທ່ານຈູຟຣີ ມັນຕັກ ຊາວເມືອງມານາໂດ ເມືອງຫລັກຂອງສຸລາເວສີເຫນືອ ກ່າວວ່າ ບໍ່ລັງກຽດທີ່ຈະກິນໂຕເຈຍແມ່ນວ່າຈະມີຄວາມເຊື່ອມໂຍງກັບໄວຣັດໂຄວິດ-19 ແຕ່ຕົນບໍ່ພົບຄົນເຈັບຕິດໄວຣັດໂຄວິດ-19 ໃນເມືອງມານາໂດຈົນເຖິງຕອນນີ້ ແລະຍັງມີຫລາຍຄົນກິນໂຕເຈຍ ເນື່ອງຈາກເປັນຂອງດີໂດຍສະເພາະເວລານຳມາປຸງອາຫານກັບກະທິ