อาทิตย์. ก.พ. 23rd, 2020

ABClao

ຂ່າວສານເພື່ອສັງຄົມ

ກໍ່ເຫດເພື່ອຊີງຊັບພົນລະເມືອງ

ເຈົ້າຫນ້າທີ່ຕຳຫຼວດກອງບັນຊາການ ປກສ ແຂວງ ບໍລິຄຳໄຊ ໄດ້ໃຫ້ຮູ້ວ່າ: ພາຍຫລັງເຈົ້າຫນ້າທີ່ ປກສ ເມືອງປາກກະດິງ ໄດ້ຮັບລາຍງານຈາກພົນລະເມືອງດີໃນຄັ້ງວັນທີ່ 09 ກຸມພາ 2020 ເວລາ ປະມານ 18ໂມງ 30 ນາທີ ມີການຄາດຕະກຳເກີດຂື້ນຢູ່ບ້ານ ໂພນຈະເລີນ ເມືອງປາກກະດິງ ແຂວງບໍລິຄຳໄຊ ຈື່ງໄດ້ແຕ່ງຕັ້ງກຳລັງເຈົ້າຫນ້າທີ່ຕຳຫຼວດ ພະແນກ ສືບສວນ-ສອບສວນ ລົງສົມທົບກັບເຈົ້າຫນ້າທີ່ ປກສ ເມືອງປາກກະດິງ ພ້ອມກັບອຳນາດການປົກຄອງບ້ານໂພນຈະເລີນ ຮ່ວມກັນສັນນະສູດສະຖານທີ່ເກີດເຫດ ພົບຜູ້ເສຍຊີວິດເປັນເພດຊາຍ ຊື່ທ້າວ ພົງເພັດ ຫຼວງລາດ ອາຍຸ 25 ປີ ປະຊາຊົນບ້ານນາຂ່າ ເມືອງນາຊາຍທອງ ນະຄອນຫລວງວຽງຈັນ ຜ່ານການສັນນະສູດຊາກສົບຜູ້ເສຍຊີວິດ ມີບາດແຜຖືກແທງດ້ວຍວັດຖຸທີ່ແຫຼມຄົມ ຕາມສັນຫລັງ ບໍລິເວນງ່ອນດົ້ນ ແລະ ກ້າຄໍ ຈຳນວນ 07 ຈຸດ ຈາກນັ້ນເຈົ້າຫນ້າທີ່ຈື່ງໄດ້ກຳນົດແລະຄັດຈ້ອນຕົວເປົ້າຫມາຍໃນທັນທີ ພ້ອມທັງປະສານສົມທົບກັບອຳນາດການປົກຄອງບ້ານອ້ອມຂ້າງໃຫ້ສະກັດກັ້ນ ຕິດຕາມຈັບໂຕເປົ້າຫມາຍຜູ້ກໍ່ເຫດມາດຳເນີນການສືບສວນ-ສອບສວນໃຫ້ທັນການ ຕົກມາຮອດເວລາ 21 ໂມງ ຂອງວັນດຽວກັນ ຈື່ງສາມາດກັກໂຕຜູ້ກະທຳຄວາມຜິດໄດ້ ຊື່ທ້າວ ສອນໄຊ (ຊັນ) ອາຍຸ 23 ປີ ປະຊາຊົນບ້ານໂພນຈະເລີນ ເມືອງປາກກະດິງ ແຂວງບໍລິຄຳໄຊ ມາດຳເນີນການສືບສວນ-ສອບສວນຕາມຂັ້ນຕອນຂອງກົດຫມາຍ.


ຜ່ານການສືບສວນ-ສອບສວນຂອງເຈົ້າຫນ້າທີ່ ທ້າວສອນໄຊ ໄດ້ໃຫ້ການກັບເຈົ້າຫນ້າທີ່ວ່າ: ໃນຄັ້ງວັນທີ່ 9 ກຸມພາ 2020 ເວລາ 10 ໂມງ 20 ນາທີ ຕົນໄດ້ໄປດື່ມເບຍນຳທ້າວໂດ ຄົນບ້ານດຽວກັນພ້ອມກັບຫມູ່ຂອງທ້າວໂດ ທີ່ມາຈາກນະຄອນຫລວງວຽງຈັນອີກ 2 ຄົນ ເຊີ່ງພວກຕົນໄດ້ນັ່ງດື່ມເບຍນຳກັນຈົນຫມົດ 12 ແກ້ວ ພາຍຫລັງເບຍຫມົດ ທ້າວໂດ ກັບຫມູ່ອີກ 1ຄົນ ຈື່ງພາກັນອອກໄປຊື້ເບຍມາດື່ມຕໍ່ ໃນເວລານັ້ນຕົນໄດ້ມີແນວຄິດຢາກໄດ້ລົດຈັກຍີ່ຫໍ້ຢາມາຮ່າ R15 ຂອງທ້າວພົງເພັດ ຕົນຈື່ງຖາມຢືມລົດຈັກນຳທ້າວພົງເພັດ ແຕ່ຜູ້ກ່ຽວບໍ່ໃຫ້ຢືມ ຫລັງຈາກນັ້ນຕົນຈື່ງບອກໃຫ້ທ້າວພົງເພັດໃຫ້ໄປສົ່ງຢູ່ເຮືອນ ພໍຂັບຂີ່ໄປຮອດເດີ່ນໂຮງຮຽນມັດທະຍົມໂພນສີ ເມືອງປາກກະດິງຜູ້ກ່ຽວຈິງໃຊ້ມີດທີ່ກຽມມາແທງເຂົ້າທາງດ້ານຫລັງຂອງທ້າວພົງເພັດ ຈຳນວນຫລາຍບາດຈົນ ທ້າວພົງເພັດ ໄປຖິ້ມໄວ້ຂ້າງທາງ (ຫ່າງຈາກຈຸດລົດລັກລົ້ມປະມານ 08 ແມັດ) ຕໍ່ມາຕົນຈື່ງໄດ້ເອົາລົດຈັກຂອງທ້າວພົງເພັດ ຂັບຂີ່ມາຫາພີ່ນ້ອງຢູ່ບ້ານດອນໄຊ ເມືອງປາກກະດິງ ພໍຂີ່ມາຮອດເຄີ່ງທາງເຂດບ້ານຫາດຊາຍຄຳ ເມືອງປາກກະດິງແຂວງບໍລິຄຳໄຊ ຕົນຈື່ງຈອດລົດຈັກແລ້ວເອົາມີດທີ່ໃຊ້ກໍ່ເຫດໂຍນຖິ້ມເຂົ້າໄປໃນສວນຢາງພາລາ ພ້ອມທັງລ້າງຄາບເລືອດທີ່ຕິດຢູ່ລົດ ແກະປ້າຍແລະສະຕິກເກີ້ລົດອອກ ແລ້ວປ່ຽນເຄື່ອງນຸ່ງໃຫ່ມ ຈາກນັ້ນກໍ່ໄດ້ຂີ່ລົດຈັກໄປຫາເຮືອນຂອງລຸງຢູ່ບ້ານດອນໄຊ ເມືອງປາກກະດິງ ແຂວງບໍລິຄຳໄຊ ແລ້ວນອນພັກຜ່ອນຢູ່ເຮືອນລຸງຂອງຕົນເຮັດຄືບໍ່ມີຫຍັງເກີດຂື້ນ ພໍຕົກມາຮອດເວລາ 21 ໂມງ ຂອງວັນດຽວກັນ ກໍ່ຖືກຕຳຫຼວດເຈົ້າຫນ້າທີ່ກັກໂຕມາດຳເນີນຄະດີຕາມລະບຽບກົດຫມາຍ ທ້າວສອນໄຊ (ຊັນ) ຍັງໄດ້ໃຫ້ການອີກວ່າຜູ້ກ່ຽວໄດ້ເຄື່ອນໄຫວເສບຢາເສບຕິດປະເພດຢາບ້າມາແລ້ວຫລາຍປີ ເຊີ່ງເສບວັນລະ 10-20 ເມັດ ແລະເສບມາຕະຫລອດ ກ່ອນລົງມືກໍ່ເຫດຄາດຕະກຳແລະຊິງຊັບໃນຄັ້ງນີ້.


ຜ່ານການສືບສວນ-ສອບສວນ ເກັບກຳຂໍ້ມູນ ແຫຼ່ງຂ່າວ ແລະກວດສະຖານທີ່ເກີດເຫດເຫັນວ່າ ທ້າວສອນໄຊ (ຊັນ) ແມ່ນ: ມີເຈດຕະນາຄາດຕະກຳ ແລະຊິງຊັບພົນລະເມືອງແທ້ ເຊີ່ງສະແດງອອກຄືຜູ້ກ່ຽວໄດ້ໃຊ້ມີດແທງຜູ້ອື່ນຫລາຍບາດຈົນເຮັດໃຫ້ຜູ້ເຄາະຮ້າຍເສຍຊີວິດ ພ້ອມທັງຊິງເອົາຊັບສິນປະເພດລົດຈັກຍີ່ຫໍ້ ຢາມາຮ່າ R15 ໄປ ການກະທຳດັ່ງກ່າວໄດ້ສ້າງຄວາມເສຍຫາຍ ແລະເຮັດໃຫ້ສັງຄົມບໍ່ມີຄວາມສະຫງົບ ເຊີ່ງເປັນການກະທຳຜິດຕາມມາດຕາ 188 ແລະມາດຕາ 232 ຂອງປະມວນກົດຫມາຍອາຍາແຫ່ງ ສປປ ລາວ ປະຈຸບັນເຈົ້າຫນ້າທີ່ຕຳຫຼວດ ປກສ ແຂວງບໍລິຄຳໄຊ ພວມດຳເນີນການສືບສວນ-ສອບສວນ ສົ່ງສຳນວນຄະດີໃຫ້ອົງການໄອຍະການ ປະຊາຊົນ ແຂວງບໍລິຄຳໄຊ ເພື່ອຟ້ອງສານຕັດສິນຕໍ່ຜູ້ກ່ຽວຕາມຂັ້ນຕອນຂອງກົດຫມາຍ.

ຂ່າວ: ປກສ ບໍລິຄຳໄຊ