อาทิตย์. ก.พ. 23rd, 2020

ABClao

ຂ່າວສານເພື່ອສັງຄົມ

ຈີນ ສັ່ງປົດຕຳແຫນ່ງເລຂາທິການພັກຄອມມູນິດມົນທົນຫູເປີ່ຍ

ສຳນັກຂ່າວຕ່າງປະເທດລາຍງານ ເມື່ອວັນທີ່ 13 ກຸມພາ 2020 ວ່າ ທ່ານຈຽງ ເຊົາລ່ຽງ ພົ້ນຈາກຕຳແຫນ່ງເລຂາທິການພັກຄອມມູນິດແຫ່ງມົນທົນຫູເປີ່ຍ ແລະທ່ານອິງ ຫຍົງ ເຈົ້ານະຄອນຊຽງໄຮ້ໄດ້ຮັບການເລື່ອນຂັ້ນໃຫ້ຮັບຕຳແຫນ່ງດັງກ່າວ ໂດຍຄວາມປ່ຽນແປງມີຜົນທັນທີ ຕາມລາຍງານຂອງສື່ທຸກແຫ່ງທີ່ເປັນກະບອກສຽງຂອງພັກຄອມມູນິດ ແລະລັດຖະບານກາງໃນປັກກິ່ງ

ທັງນີ້ ພຽງ 2 ວັນກ່ອນຫນ້ານັ້ນ ທ່ານຫວັງ ເຫີເຊິງ ອະດີດຮອງປະທານຄະນະກຳມະການສາທາລະນະສຸກແຫ່ງຊາດ ຊື່ງຄະນະກຳມະການກາງພັກຄອມມູນິດແຕ່ງຕັ້ງເມື່ອທ້າຍອາທິດຜ່ານມາ ໃຫ້ດຳລົງຕຳແຫນ່ງພິເສດໃນຄະນະເຮັດວຽກຕອບສະຫນອງສຸກເສີນເພື່ອຕໍ່ສູ້ກັບເຊື້ອໄວຣັດໂຄໂຣນາສາຍພັນໃຫ່ມທີ່ນາຍົກລັດຖະມົນຕີຫລີ່ ເຄີ່ສຽງ ເປັນປະທານ ສັ່ງປົດທ່ານຈາງ ຈິງ ອອກຈາກຕຳແຫນ່ງເລຂາທິການຄະນະກຳມະທິການດ້ານສາທາລະນະສຸກຂອງພັກຄອມມູນິດປະຈຳມົນທົນຫູເປີ່ຍ ແລະທ່ານຫລິວ ອິງຈື໋ ພົ້ນຈາກຕຳແຫນ່ງຜູ້ອຳນວຍການຄະນະກຳມະທິການດ້ານສາທາລະນະສຸກຂອງພັກຄອມມູນິດແຫ່ງມົນທົນຫູເປີ່ຍ

ຂະນະດຽວກັນ ທ່ານຫມ່າ ກັ໋ວສຽງ ພົ້ນຈາກຕຳແຫນ່ງເລຂາທິການພັກຄອມມູນິດປະຈຳເມືອງອູ່ຮັ່ນເມືອງເອກຂອງມົນທົນຫູເປີ່ຍ ແລະໃຫ້ທ່ານຫວັງ ຈົງຫລິນ ເລຂາທິການພັກຄອມມູນິດປະຈຳເມືອງຈີ່ຫນານ ເມືອງເອກຂອງມົນທົນຊານຕົງ ໃຫ້ມາຮັບຕຳແຫນ່ງແທນ ໂດຍຄວາມປ່ຽນແປງມີຜົນທັນທີເຊັ່ນກັນ

ແມ່ນວ່າບໍ່ມີການໃຫ້ເຫດຜົນປະກອບການປົດ ແລະຍ້າຍຕຳແຫນ່ງຄັ້ງນີ້ ຢ່າງໃດກໍ່ຕາມ ສະຖານະການເກີດຂື້ນພຽງບໍ່ເທົ່າໃດຊົ່ວໂມງ ຫລັງຄະນະກຳມະທິການສາທາລະນະສຸກແຫ່ງມົນທົນຫູເປີ່ຍລາຍງານຜູ້ເສຍຊີວິດຈາກເຊື້ອໄວຣັດໂຄໂຣນາສາຍພັນໃຫ່ມ ໂຄວິດ-19 ເພີ່ມຂື້ນ 242 ຄົນ ແລະມີຄົນເຈັບເພີ່ມຂື້ນອີກ 14,840 ຄົນ ສະເພາະເມື່ອວັນພຸດພຽງວັນດຽວ ສົ່ງຜົນໃຫ້ສະຖິຕິທົ່ວປະເທດຕັ້ງແຕ່ເດືອນທັນວາປີຜ່ານມາສະເພາະໃນແຜ່ນດິນໃຫ່ຍມີຄົນເຈັບຕິດພະຍາດໂຄວິດ-19 ຢ່າງຫນ້ອຍ 59,805 ຄົນ