อาทิตย์. ก.พ. 23rd, 2020

ABClao

ຂ່າວສານເພື່ອສັງຄົມ

ເຮັດແທ້! ເມົາແລ້ວຂັບຖືກກັກຕົວແນ່ນອນ

ພັຕ ສິນທະລາ ແສງປະເສີດ ຫົວໜ້າກອງຮ້ອຍຈະລາຈອນ ປກສ ເມືອງໄຊເສດຖາ ນະຄອນຫຼວງວຽງຈັນ ໄດ້ໃຫ້ສໍາພາດຕໍ່ນັກຂ່າວ ປກສ ນະຄອນຫຼວງວຽງຈັນ ໃນຕອນເຊົ້າວັນທີ 12 ກຸມພາ 2020 ວ່າ: ໃນເດືອນກຸມພານີ້ ກອງຮ້ອຍຈະລາຈອນ ປກສ ເມືອງໄຊເສດຖາ ຈະສຸມໃສ່ 2 ວຽກງານໃຫຍ່ ໃຫ້ປະກົດຜົນເປັນຈິງຄື: ວຽກງານໂຄສະນາ: ຈະໂຄສະນາເຜີຍແຜ່ກົດລະບຽບການສັນຈອນ ໃຫ້ຜູ້ໃຊ້ລົດໃຊ້ຖະໜົນ ໄດ້ຮັບຮູ້ ແລະ ເຂົ້າໃຈຢ່າງເລິກເຊິງ ກ່ຽວກັບລະບຽບການສັນຈອນ ຢູ່ຕາມເສັ້ນທາງ 3 ແຍກ 4 ແຍກ, ໂຮງຮຽນ, ໂຮງຈັກ, ໂຮງງານ, ຕະຫຼາດ ແລະ ບັນດາຈຸດຊຸມຊົນທີ່ມີຄວາມແອອັດ, ສັບສົນ ເພື່ອຫຼຸດຜ່ອນບັນຫາອຸບັດຕິເຫດ; ວຽກງານປ້ອງກັນ: ໂດຍສະເພາະແມ່ນວັນທີ 14 ກຸມພານີ້ ຈະລົງຕັ້ງດ່ານກວດບັນດານັກຂັບຂີ່ ແລະ ເຕື່ອນສະຕິໃຫ້ນັກຂັບຂີ່ ມີສະຕິໃນການໃຊ້ລົດໃຊ້ຖະໜົນເປັນຕົ້ນ: ແມ່ນກວດກາທາດເຫຼົ້າ ແລະ ດື່ມສິ່ງມືນເມົາ ຖ້າຫາກພົບເຫັນແມ່ນຈະໄດ້ກັກຕົວໄວ້ ແລ້ວນຳມາສຶກສາອົບຮົມໃຫ້ນັກຂັບຂີ່ມີການປ່ຽນແປງ ເພື່ອຫຼຸດຜ່ອນບັນຫາອຸບັດຕິເຫດທີ່ຈະເກີດຂຶ້ນ.

ຮອ ອຸ່ນຄຳ ສີຫາລາດ ຄະນະຮັບຜິດຊອບວຽກງານກວດກາ ເມືອງໄຊເສດຖາ ນວ ໃຫ້ຮູ້ວ່າ: ການລົງຕັ້ງຈຸດກວດແຕ່ລະຄັ້ງ ແມ່ນໄດ້ສຸມໃສ່ບັນດາລົດທີ່ບໍ່ເສຍຄ່າທາງ, ລົດບໍ່ຕິດປ້າຍ, ປ້າຍຫັກ, ບໍ່ມີໃບຂັບຂີ່, ຖ້າພົບເຫັນຜູ້ລະເມີດລະບຽບ ກໍລະນີໃບຂັບຂີ່ໝົດກຳນົດ, ບໍ່ມີໃບຂັບຂີ່ ແລະ ບໍ່ໃສ່ໝວກກັນກະທົບ ແມ່ນໄດ້ນຳມາສຶກສາອົບຮົມກັບທີ່, ກໍລະນີປ້າຍຫັກ, ບໍ່ເສຍຄ່າທາງ ແມ່ນໄດ້ຂຽນໃບສັ່ງ ເພື່ອນຳໄປສຶກສາອົບຮົມໃຫ້ຮັບຮູ້ ແລະ ເຂົ້າໃຈຕໍ່ກົດລະບຽບໃນການຂັບຂີ່ລົດ, ໃນການລົງປະຕິບັດໜ້າທີ່ໃນໄລຍະຜ່ານມາ ແມ່ນປະຊາຊົນໃຫ້ຄວາມຮ່ວມມືກັບເຈົ້າໜ້າທີ່ ໃນການຕັ້ງດ່ານກວດລົດ, ການຢຸດ, ຈອດລົດ, ແຕ່ຍັງມີນັກຂັບຂີ່ຈຳນວນໜຶ່ງ ບໍ່ໃຫ້ຄວາມຮ່ວມມືກັບເຈົ້າໜ້າທີ່ເທົ່າທີ່ຄວນເປັນຕົ້ນ: ເວລາເຈົ້າທີ່ຕັ້ງດ່ານກວດເປົ່າບໍ່ຈອດ ແລະ ອື່ນໆ, ໃນຕໍ່ໜ້າ ຈະສຸມໃສ່ໂຄສະນາ, ເຜີຍແຜ່ລະບຽບການສັນຈອນທາງບົກ ໃຫ້ນັກຂັບຂີ່ໄດ້ຮັບຮູ້ ແລະ ເຂົ້າໃຈຢ່າງເລິກເຊິງ, ເນື່ອງໃນວັນທີ 14 ກຸມພານີ້ ອີງຕາມທິດຊີ້ນຳຂອງຂັ້ນເທິງ ແລະ ແຜນຂອງກອງບັນຊາການ ປກສ ເມືອງໄຊເສດຖາ ກອງຮ້ອຍຈະລາຈອນ ປກສ ເມືອງໄຊເສດຖາ ຈະໄດ້ລົງຕັ້ງດ່ານກວດກາຢ່າງເຂັ້ມງວດ ໂດຍສະເພາະສຸມໃສ່ກວດທາດເຫຼົ້າ, ດື່ມສິງມືນເມົາຕ່າງໆ ກໍລະນີພົບເຫັນຜູ້ລະເມີດແມ່ນຈະໄດ້ໃຊ້ມາດຕະການຢ່າງເຂັ້ມງວດ.

ຂ່າວ: ປກສ ນວ