อาทิตย์. ก.พ. 23rd, 2020

ABClao

ຂ່າວສານເພື່ອສັງຄົມ

ໂຮງໝໍແຂວງບໍ່ແກ້ວ ມີຫ້ອງຟອກໄຂ່ຫຼັງແລ້ວ

ພິທີຕັດແຖບຜ້າເປີດການໃຫ້ບໍລິການຫ້ອງຟອກໄຂ່ຫຼັງ ຂອງໂຮງໝໍແຂວງບໍ່ແກ້ວ ໄດ້ຈັດຂຶ້ນໃນວັນທີ 13 ກຸມ ພາ 2020 ນີ້, ໂດຍມີທ່ານ ຮສ ດຣ ບຸນກອງ ສີຫາວົງ ລັດ ຖະມົນຕີ ກະຊວງສາທາລະນະສຸກ, ທ່ານ ປອ ບົວຄົງ ນາມມະວົງ ເຈົ້າແຂວງໆບໍ່ແກ້ວ, ເຂົ້າຮ່ວມມີທ່ານ ດຣ ຄໍາຜະຫຍາ ພົມປັນຍາ ຫົວໜ້າພະແນກ ສາທາລະນະສຸກແຂວງ ພ້ອມດ້ວຍພາກສ່ວນທີ່ກ່ຽວຂ້ອງ ພະນັກງານແພດໝໍເຂົ້າຮ່ວມ.

ທ່ານ ດຣ ອານຸສິດ ສີລິສັກ ຮອງອຳນວຍການໂຮງໝໍແຂວງ ໄດ້ກ່າວວ່າ: ເພື່ອປະຕິບັດເນື້ອໃນຂອງວຽກງານ 5 ດີ 1 ພໍໃຈ ທາງກະຊວງສາທາລະນະສຸກ ກໍຄືທາງກົມປິ່ນປົ່ວ ຈຶ່ງໄດ້ປະກອບອຸປະກອນເຄື່ອງຟອກໄຂ່ຫຼັງ 2 ເຄື່ອງ ໃນຄັ້ງວັນທີ 22/02/2019 ແລະ ຕິດຕັ້ງເຄື່ອງ ວັນທີ 04/03/2019, ໄດ້ຕຽມຫ້ອງຟອກ ແລະ ອຸປະກອນໃນຫ້ອງຟອກ ( ຕຽມລະບົບນໍ້າ RO ), ຈັດສົ່ງທີມງານໝໍ, ພະຍາບານ ແລະ ຊ່າງສ້ອມ ແປງໄປຝຶກອົບຮົມ ຢູ່ປະເທດໄທ, ສຶກສາເບິ່ງຂັ້ນຕອນການປະຕິບັດຕົວຈິງ ຢູ່ ສສ ຫວຽດນາມ, ເຊີນອາຈານຈາກສູນ ກາງມາຊ່ວຍໃນເບື້ອງຕົ້ນ.

ທັງນີ້ ກໍເພື່ອອໍານວຍຄວາມສະດວກ ແລະ ຫຼຸດຜ່ອນການໃຊ້ຈ່າຍຂອງພໍ່ແມ່ປະຊາຊົນບັນດາເຜົ່າ ເພາະພະຍາດດັ່ງກ່າວ ( ໄຂ່ຫຼັງຊຸດໂຊມ ) ໃຊ້ໄລຍະເວລາໃນການປິ່ນປົ່ວຍາວນານ ແລະ ໄດ້ໃຊ້ຄ່າໃຊ້ຈ່າຍເຂົ້າໃນການປິ່ນປົ່ວເປັນຈໍານວນຫຼາຍ.
ຂ່າວ: ຕິມໃຈ – ພາບ: ບຸນເພັດ