อาทิตย์. ก.พ. 23rd, 2020

ABClao

ຂ່າວສານເພື່ອສັງຄົມ

ໄວລຸ້ນສອງຄົນຮ່ວມກັນລັກລົດຈັກ ປະຊາຊົນ

ໃນວັນທີ 11 ກຸມພາ 2020 ຜ່ານມານີ້ ເຈົ້າໜ້າທີ່ ປກສ ເມືອງອຸທຸມພອນ ໄດ້ມອບລົດຈັກຍີ່ຫໍ້ຮອນດ້າເວບໄອ 1 ຄັນຄືນໃຫ້ເຈົ້າຂອງເດີມ ພາຍຫຼັງຖືກຄົນຮ້າຍລັກໄປ ໃນວັນທີ 6 ພະຈິກ 2019 ແລະ ເຈົ້າໜ້າທີ່ສາມາດຈັບຕົວຜູ້ຮ່ວມຂະບວນການມາດຳເນີນຄະດີໄດ້. ໂດຍແມ່ນທ້າວ ໄພວັນ (ກູດ) ອາຍຸ 20 ປີ ອາຊີບວ່າງງານ ຢູ່ບ້ານເຊໂນ ເມືອງອຸທຸມພອນ ແຂວງສະຫວັນນະເຂດ ແລະ ທ້າວ ໜູກອນ ອາຍຸ 23 ປີ ອາຊີບວ່າງງານ ຢູ່ບ້ານໄຊສົມບູນ ເມືອງອຸທຸມພອນ ແຂວງສະຫວັນນະເຂດ.


ທ່ານ ພັນຕີ ສຸລິເວດ ສີຫາລາດ ຫົວໜ້າໜ່ວຍງານຄະດີອາຍາ ປກສ ເມືອງອຸທຸມພອນ ໄດ້ໃຫ້ຮູ້ວ່າ: ໃນວັນທີ 6 ພະຈິກ 2019 ຄົນຮ້າຍໄດ້ເຂົ້າລັກເອົາລົດຈັກຢູ່ເຮືອນ ນາງ ຄໍາມະນີ ອາຍຸ 54 ປີ, ພະນັກງານບໍານານ ຢູ່ບ້ານເຊໂນ ເມືອງອຸທຸມພອນ, ມີຜົນເສຍຫາຍລົດຈັກຍີ່ຫໍ້ຮອນດ້າເວບໄອ ສີຟ້າ-ຂາວ 1 ຄັນ, ປ້າຍ ທະບຽນ ສຂ/ຍກ 0039 ແລະ ໂມງ 2 ໜ່ວຍ (ໂມງໃສ່ແຂນ). ມາຮອດວັນທີ 7 ພະຈິກ 2019 ທາງເຈົ້າຫນ້າທີ່ໜ່ວຍງານຄະດີອາຍາຈິ່ງສາມາດກັກຕົວ : ທ້າວ ໄພວັນ (ກູດ) ອາຍຸ 20 ປີ, ວ່າງງານ ຢູ່ບ້ານເຊໂນ ເມືອງອຸທຸມພອນ ແຂວງສະຫວັນນະເຂດ ແລະ ຕົກມາຮອດວັນທີ 23 ມັງກອນ 2020 ຈິ່ງໄດ້ກັກຕົວຜູ້ຮ່ວມລັກ ທ້າວ ໜູກອນ ອາຍຸ 23 ປີ, ອາຊີບວ່າງງານ ຢູ່ບ້ານໄຊສົມບູນ ເມືອງອຸທຸມພອນ ແຂວງສະຫວັນນະເຂດ ມາດໍາເນີນການສືບສວນ-ສອບສວນຕາມຂັ້ນຕອນຂອງກົດໝາຍ.

ຜ່ານການສືບສວນ-ສອບສວນເອົາຄໍາໃຫ້ການພວກກ່ຽວທັງ 2 ໃຫ້ການຮັບສາລະພາບວ່າ: ໃນເວລາ 10 ໂມງ, ຂອງວັນທີ 6 ພະຈິກ 2019 ທ້າວ ໄພວັນ ແລະ ທ້າວ ຫນູກອນ ໄດ້ວາງແຜນກັນເຂົ້າໄປລັກເອົາລົດຈັກຢູ່ເຮືອນນາງ ຄໍາມະນີ, ເມື່ອສັງເກດເຫັນວ່າ: ບໍ່ມີຄົນຢູ່ເຮືອນ ທ້າວ ໄພວັນ (ກູດ) ຈິ່ງເຂົ້າໄປລັກເອົາລົດຈັກຍີ່ຫໍ້ເວບໄອ, ສີຟ້າ-ຂາວ, ພ້ອມດ້ວຍໂມງ 2 ຫນ່ວຍ, ເມື່ອໄດ້ລົດ ທ້າວ ໄພວັນ ກໍ່ໄດ້ເອົາລົດໃຫ້ທ້າວ ໜູກອນ ເປັນຜູ້ເອົາໄປຂາຍ, ໃນລາຄາ 17 ພັນບາດ (ສະກຸນເງິນໄທ), ສ່ວນເງິນຂາຍລົດແມ່ນໄດ້ແບ່ງປັນກັນແລ້ວຊື້ຢາເສບຕິດ ມາເສບ ແລະ ຊື້ບັດເຕີມເກມພະນັນອອນລາຍຈົນໝົດ. ຜ່ານການສອບສວນເອົາຄໍາໃຫ້ການທ້າວ ໄພວັນ (ກູດ) ແລະ ທ້າວ ໜູກອນ ເຫັນວ່າ: ພວກກ່ຽວແມ່ນ ໄດ້ຮ່ວມກັນລັກລົດຈັກຂອງນາງ ຄໍາມະນີ ແທ້ຈິງ, ຜິດໃນສະຖານລັກຊັບ, ໂດຍເອົາຊັບຂອງຄົນອື່ນມາເປັນຂອງຕົນໂດຍບໍ່ຖືກຕ້ອງ ການເຄື່ອນໄຫວພວກກ່ຽວແມ່ນຜິດຕໍ່ມາດຕາ 231 ຂອງປະມວນກົດໝາຍອາຍາ ສະບັບປັບປຸງປີ 2017.

ທ່ານຫົວໜ້າໜ່ວຍງານຄະດີອາຍາ ປກສ ເມືອງອຸທຸມພອນ ຍັງໃຫ້ຮູ້ອີກວ່າ: ຂະບວນການດັ່ງກ່າວເຮັດເປັນກຸ່ມແກ້ງ, ທັງຜູ້ເຄື່ອນໄຫວລັກ ແລະ ຜູ້ທີ່ຕິດຕໍ່ຮັບຊື້ ໂດຍພວກເຂົາຈະເຄື່ອນໄຫວລັກເອົາລົດຈັກຕາມສະຖານທີ່ຕ່າງໆເຊັ່ນ: ຕະຫຼາດ, ສຳນັກງານຫ້ອງການ ແລະ ບ້ານເຮືອນທີ່ມີເງື່ອນໄຂ. ປະຈຸບັນຄະດີລັກຊັບຂອງແກ້ງດັ່ງກ່າວ ເຈົ້າໜ້າທີ່ຍັງສືບຕໍ່ກວາດລ້າງ ເພື່ອເລັ່ງຕິດຕາມຕົວມາດຳເນີນຄະດີ.


ນັກຂ່າວເມືອງອຸທຸມພອນ
ພອນປະເສີດ ແຜນພັກດີ