อาทิตย์. ก.พ. 23rd, 2020

ABClao

ຂ່າວສານເພື່ອສັງຄົມ

ພັກຄອມມູນິດຈີນ ສັ່ງປົດເລຂາທິການ ແລະຜູ້ອຳນວຍການສາທາລະນະສຸກ ຫູເປີ່ຍ

ສຳນັກຂ່າວຕ່າງປະເທດລາຍງານເມື່ອວັນທີ່ 11 ກຸມພາ 2020 ໂດຍອ້າງຈາກລາຍງານຂອງສຳນັກຂ່າວຊິນຫົວ ແລະສະຖານີວິທະຍຸໂທລະພາບກາງແຫ່ງປະເທດຈີນ (ຊີຊີທີວີ) ວ່າທ່ານຈາງ ຈິງ ແລະທ່ານຫລິວ ອິງຈື່ ພົ້ນຈາກຕຳແຫນ່ງເລຂາທິການຄະນະກຳມະທິການດ້ານສາທາລະນະສຸກຂອງພັກຄອມມູນິດປະຈຳມົນທົນຫູເປີ່ຍ ແລະຜູ້ອຳນວຍການຄະນະກຳມະທິການດ້ານສາທາລະນະສຸກຂອງພັກຄອມມູນິດແຫ່ງມົນທົນຫູເປີ່ຍ ສູນກາງການແຜ່ລະບາດຂອງເຊື້ອໄວຣັດໂຄໂຣນາສາຍພັນໃຫ່ມ ຊື່ງມີຜູ້ເສຍຊີວິດຫລາຍກວ່າ 1.100 ຄົນຕັ້ງແຕ່ເດືອນທັນວາປີຜ່ານມາ

 

ທັງນີ້ ການພົ້ນຈາກຕຳແຫນ່ງຂອງທັງສອງທ່ານມີຜົນທັນທີ ໂດຍເປັນໄປຕາມຄຳສັ່ງຂອງທ່ານຫວັງ ເຫີເຊິງ ອະດີດຮອງປະທານຄະນະກຳມະທິການສາທາລະນະສຸກແຫ່ງຊາດ ຊື່ງຄະນະກຳມະການກາງພັກຄອມມູນິດແຕ່ງຕັ້ງເມື່ອທ້າຍອາທິດຜ່ານມາໃຫ້ດຳລົງຕຳແຫນ່ງພິເສດໃນຄະນະທຳງານຕອບສະຫນອງສຸກເສີນເພື່ອຕໍ່ສູ້ກັບເຊື້ອໄວຣັດໂຄໂຣນາສາຍພັນໃຫ່ມທີ່ນາຍົກລັດຖະມົນຕີຫລີ່ ເຄີ່ຊຽງ ເປັນປະທານ

 

ອີກຢ່າງ ການຮັບຕຳແຫນ່ງດັງກ່າວຂອງຫວັງ ເກີດຂື້ນທ່າມກາງຄວາມບໍ່ພໍໃຈຢ່າງຫນັກຂອງຊາວຈີນຈຳນວນຫລາຍ ເນື່ອງຈາກບໍ່ເທົ່າໃດມື້ກ່ອນຫນ້ານັ້ນ ເຊັ່ນທ່ານຫມໍ ຫລີ່ ເຫວິນຫລຽງ ແພດຫນຸ່ມອາຍຸ 34 ປີ ເສຍຊີວິດທີ່ໂຮງຫມໍກາງແຫ່ງເມືອງອູ່ຮັ່ນ ດ້ວຍອາການປອດອັກເສບ ແລະຫົວໃຈຫລົ້ມເຫລວສຸກເສີນຈາກເຊື້ອໄວຣັດໂຄໂຣນາສາຍພັນໃຫ່ມ ໂດຍທ່ານ ຫລຽງ ຖືກດຳເນີນຄະດີວ່າ ປ່ອຍຂ່າວປອມ ທັງທີ່ເຈົ້າໂຕພະຍາຍາມແຈ້ງເຕືອນທຸກຝ່າຍໃຫ້ເພີ່ມຄວາມຈິງຈັງໃນການກວດສອບ ແລະຮັບມືກັບ ໂລກປອດບວມຄ້າຍຊາຣສ ທີ່ທ່ານ ຫລີ່ ພົບຄົນເຈັບຢ່າງຫນ້ອຍ 7 ຄົນເມື່ອທ້າຍປີຜ່ານມາ