28/05/2020

ABClao

ຂ່າວສານເພື່ອສັງຄົມ

ຈີນພົບວັດຖຸບູຮານ 180,000 ອັນ ໃນຊາກເຮືອສະໄຫມລາຊະວົງຊົ່ງໃຕ້

ສຳນັກຂ່າວຊິນຫົວລາຍງານ ເມື່ອວັນທີ 17 ພຶດສະພາ 2020 ວ່າ ໂຄງການຂຸດຄົ້ນແຫຼ່ງບູຮານຄະດີໃຕ້ນ້ຳຊາກເຮືອທີ່ອັບປາງສະໄຫມລາຊະວົງຊົ່ງໃຕ້ ຫນານໄຫ່ຫມາຍເລກ 1 ໃນມົນທົນກວ່າງຕົງ ຫລື ກວາງຕຸ້ງ ສັນນິຖານວ່າເປັນເຮືອສິນຄ້າໄດ້ຮັບເລືອກໃຫ້ເປັນ 1 ໃນ 10 ອັນດັບຂອງການຄົ້ນພົບທາງບູຮານຄະດີປະຈຳປີ 2019

ສຳນັກງານມໍລະດົກທາງວັດທະນະທຳແຫ່ງລັດ (SACH) ຂອງຈີນເປີດເຜີຍວ່າ ຄະນະນັກບູຮານຄະດີຈີນຄົ້ນພົບວັດຖຸຫລາຍກວ່າ 180,000 ອັນ ຈາກຊາກເຮືອສິນຄ້າບູຮານຍຸກລາຊະວົງຊົ່ງ (ຄສ 960-1279) ເປັນບູຮານວັດຖຸຫລາກຫລາຍປະເພດ ເຊັ່ນວ່າ ເຄື່ອງກະເບື້ອງເຄືອບ ເຄື່ອງທອງແດງ ແລະເຄື່ອງເງີນ-ຄຳ ເຄື່ອງໄມ້ເຄືອບເງົາ ແລະຫຼຽນກະສາບເປັນຕົ້ນລາຍງານລະບຸວ່າ ມີຜູ້ຄົ້ນພົບຊາກເຮືອຫນານໄຫ່ (Nanhai) ຫມາຍເລກ 1 ເມື່ອປີ 1987 ແລະກູ້ຂື້ນຈາກທະເລຈີນໃຕ້ເມື່ອປີ 2007 ກ່ອນເຄື່ອນຍ້າຍໄປຍັງເຄຊອງ (ຖານຮາກແບບປ່ອງ) ຂະຫນາດໃຫ່ຍທີ່ມີຄວາມກວ້າງ 14 ແມັດ ຍາວ 40 ແມັດ ສູງ 8 ແມັດ ຫລຸມທີ່ສ້າງຂື້ນເປັນພິເສດນີ້ຢູ່ໃນພິພິທະພັນເສັ້ນທາງສາຍໄຫມທາງທະເລກວ່າງຕົງ (Guangdong Maritime Silk Road Museum) ເກາະໄຫ່ຫລິງ ເມືອງຢາງຈຽງ ມົນທົນກວ່າງຕົງ

ຄະນະຜູ້ຊ່ຽວຊານກ່າວວ່າ ວັດຖຸຈາກຊາກເຮືອສະທ້ອນບັນຍາກາດການຄ້າທາງທະເລອັນຮຸ່ງເຮືອງ ຍຸກລາຊະວົງຊົ່ງ ແລະມີຄວາມສຳຄັນຕໍ່ການວິໄຈປະຫວັດສາດການຕໍ່ເຮືອ ເຊຣາມິກ ການຂົນສົ່ງສິນຄ້າ ແລະອື່ນໆ ໃນຍຸກຈີນບູຮານລວມເຖິງເອເຊຍຕາເວັນອອກ ແລະຕາເວັນອອກສ່ຽງໃຕ້ ທັງນີ້ ການກອບກູ້ ການສຳຫຼວດ ແລະການປົກປ້ອງຊາກເຮືອສິນຄ້າຫນານໄຫ່ ຫມາຍເລກ 1 ຖືເປັນຕົວຢ່າງພັດທະນາການອັນວ່ອງໄວໃນການຂຸດຄົ້ນທາງບູຮານຄະດີໃຕ້ນ້ຳຂອງຈີນຕະຫລອດໄລຍະເວລາກວ່າ 30 ປີທີ່ຜ່ານມາ

ທ່ານຊຸຍຫຍົ່ງ ຫົວຫນ້າທີມຂຸດຄົ້ນເຮືອຫນານໄຫ່ຫມາຍເລກ 1 ໃຫ້ສຳພາດວ່າ ການຂຸດຄົ້ນຕ້ອງໃຊ້ເວລາດົນ ບູຮານວັດຖຸທຸກອັນຕ້ອງນຳໄປຜ່ານຂະບວນການເອົາເກືອອອກແລະເຮັດໃຫ້ແຫ້ງ ໂດຍທະຍອຍແບ່ງການຈັດການວັດຖຸເຫລົ່ານີ້ເປັນຊຸດໆ ແລະງານອານຸລັກໄມ້ອາດໃຊ້ເວລາດົນ 10-20 ປີ

ຄະນະຜູ້ຊ່ຽວຊານລະບຸວ່າເຮືອຫນານໄຫ່ຫມາຍເລກ 1 ໃຫ້ເບາະແສນານັບປະການດ້ານການຕໍ່ເຮືອ ເຊຣາມິກ ແລະການວິໄຈການສົ່ງອອກສິນຄ້າທາງເຮືອໃນຍຸກຈີນບູຮານ ລວມເຖິງເອເຊຍຕາເວັນອອກ ແລະເອເຊຍຕາເວັນອອກສ່ຽງໃຕ້ໂດຍລວມ ການຄົ້ນພົບເຮືອລຳນີ້ຈະຊ່ວຍມະນຸດຊາດໄຂປິດສະຫນາການຄ້າທາງທະເລຊື່ງຄັ້ງຫນື່ງເຄີຍຮຸ່ງເຮືອງໃນສະໄຫມລາຊະວົງຊົ່ງ

ສຳລັບ ລາດຊະວົງຊົ່ງ ວິກິພີເດຍລະບຸວ່າ ເປັນລາຊະວົງທີ່ປົກຄອງປະເທດຈີນຢູ່ລະຫວ່າງປີ ຄສ 960-1279 ລັດຖະບານຊົ່ງເປັນລັດຖະບານທຳອິດໃນໂລກທີ່ໃຊ້ເງີນຕາແບບເຈ້ຍ
ລາຊະວົງຊົ່ງຖືກຮຸກຮານໂດຍຊົນເຜົ່າຕ່າງໆ ຢູ່ເປັນໄລຍະ ເຊັ່ນພວກເຊີ່ຍ ພວກຊິຕັນ (ເມືອງຫລຽວ) ຈີນມີເສິກຢູ່ຕະຫລອດມາລວມເຖິງການຮຸກຮານຈາກຊົນເຜົ່າຈິ້ນຫລືກິມ ບຸກຈົນເຖິງເມືອງໄຄຟົງ ລາຊະວົງຊົ່ງຈຶງຕ້ອງຍ້າຍເມືອງຫລວງ ໄປຢູ່ທາງທິດໃຕ້ (ເຂດເຈີ້ຈຽງ) ມີຊື່ເອີ້ນວ່າ ຊົ່ງໃຕ້ ແມ່ນວ່າຈະຍ້າຍເມືອງຫລວງແລ້ວ ແຕ່ພວກຈິ້ນຍັງຕາມຮຸກຮານກະທັ່ງພວກຈິ້ນ ເຊີ່ຍ ແລະຊິຕັນ ກໍ່ຖືກມົງໂກລ ພາຍໃຕ້ການນຳຂອງ ເຈັງກິສຂ່ານ (ເຕມູຈິນ) ເຂົ້າຕີ ແລ້ວຫັນມາຕີຈີນຕໍ່ຈົນເຖິງປັກກິ່ງ ຈົນສິ້ນລາຊະວົງໃນທີ່ສຸດ ຈາກນັ້ນກຸບໄລຂ່ານຈື່ງຕັ້ງລາຊະວົງຫຍວນຂື້ນມາແທນ