28/05/2020

ABClao

ຂ່າວສານເພື່ອສັງຄົມ

ໄປລ່າສັດແລ້ວຫລົງຍິງຄົນເສຍຊີວິດ

ໃນວັນທີ 8 ພຶດສະພາ 2020 ນີ້ ເຈົ້າໜ້າທີ່ວິຊາສະເພາະພະແນກສືບສວນ-ສອບສວນ ຫ້ອງຕຳຫຼວດ ປກສ ແຂວງອຸດົມໄຊສົມທົບກັບ ປກສ ກຸ່ມ ແລະ ອົງການປົກຄອງບ້ານຫ້ວຍຮູມ ເມືອງໄຊ ແຂວງອຸດົມໄຊ ພ້ອມຜູ້ຖືກຫາ ໄປທົດສະກຳຄືນເຫດການຊົມໃຊ້ປືນແກັບໄປລ່າສັດຫຼົງຍິງຄົນເສຍຊີວິດ 01 ລາຍ ຢູ່ທີ່ຈຸດເກີດເຫດ ເຂດບ້ານດັ່ງກ່າວ ເພື່ອປະກອບຄຳຮັບສາລະພາບກຽມສັ່ງຟ້ອງສານຕັດສິນຕາມລະບຽບກົດໝາຍ.

ວັນທີ 06 ກຸມພາ 2020 ເຈົ້າໜ້າທີ່ພະແນກສືບສວນ-ສອບສວນ ຫ້ອງຕຳຫຼວດ ປກສ ແຂວງອຸດົມໄຊ ໄດ້ຮັບການລາຍງານວ່າ: ມີຄົນເສຍຊີວິດຢູ່ຂອບເຂດບ້ານຫ້ວຍຮູມ ເມືອງໄຊ ແຂວງອຸດົມໄຊ,ດັ່ງນັ້ນຈິ່ງໄດ້ແຕ່ງຕັ້ງພະນັກງານວິຊາສະເພາະລົງຊັນນະສູດສະຖານທີ່ເກີດເຫດ ແລະ ຊາກສົບ ຜ່ານການຊັນນະສູດຕົວຈິງພົບເຫັນ ລູກໂດດ(ລູກປືນແກັບ)ຝັງຢູ່ບໍລິເວນກົ້ນເບື້ອງຂວາຂອງຜູ້ຖືກເຄາະຮ້າຍ 01 ຈຸດ ແລະ ຮູ້ວ່າຜູ້ເສຍຊີວິດຊື່ທ້າວ ພອນ ອາຍຸ 30 ປີ ອາຊີບເຮັດສວນ ຢູ່ບ້ານຫ້ວຍຮູມ ເມືອງໄຊ ແຂວງອຸດົມໄຊ, ຈາກເຫດການດັ່ງກ່າວເຈົ້າໜ້າທີ່ວິຊາສະເພາະຈິ່ງໄດ້ຕິດຕາມກວດກາ ແລະ ຂຶ້ນບັນຊີເປົ້າໝາຍຫາຜູ້ກໍ່ການກະທຳຜິດມາດຳເນີນຄະດີຕາມລະບຽບກົດໝາຍ ມາໃນວັນທີ 19 ກຸມພາ 2020 ຈິ່ງສາມາດກັກຕົວ(ຜູ້ຖືກຫາ) ຊື່ ທ້າວຮັກ,ອາຍຸ 22 ປີ ອາຊີບເຮັດສວນ ເປັນຄົນບ້ານດຽວກັນກັບຜູ້ເສຍຊີວິດ.

ຜ່ານການສືບສວນ-ສອບສວນ ທ້າວຮັກ(ຜູ້ຖືກຫາ)ໄດ້ຮັບສາລະພາບຕໍ່ເຈົ້າໜ້າທີ່ວ່າ: ໃນເວລາປະມານ 23 ໂມງ ຂອງວັນທີ 01 ພຶດສະພາ ປີ 2020 ຕົນເອງໄດ້ຢືມປືນແກັບນຳທ້າວ ວັນ ຢູ່ບ້ານດຽວກັນ ຈຸດປະສົງເພື່ອຈະເອົາໄປຊອກຍິງສັດປ່າພໍໄປຮອດຫ້ວຍນໍ້າເກີດແມ່ນໄດ້ພົບເຫັນທ້າວ ບຸນ ຄົນບ້ານດຽວກັນຕົນເອງໄດ້ຖາມທ້າວບຸນວ່າຈະໄປຫຍັງ ແລະ ທ້າວບຸນຕອບວ່າຈະໄປເກັບດອກແຂມ ຫຼັງຈາກນັ້ນ,ກໍ່ໄດ້ແຍກທາງກັນ ສ່ວນຕົນເອງແມ່ນໄດ້ຍ່າງຂຶ້ນເທິງສວນໝາກເດືອຍ ພໍໄປຮອດສັນພູໃນເວລານັ້ນຕົນເອງໄດ້ເຍືອງໄຟສາຍແລ້ວໄດ້ພົບເຫັນໂຕຟານໝົດທັງໂຕ ຈາກນັ້ນ,ກໍ່ໄດ້ເອົາລູກໂດດຍັດໃສ່ປືນແກັບ ຈຳນວນ 01 ລູກ,ພ້ອມກັບລູກຂີ້ຫວ້ານແລ້ວເລັ່ງໃສ່ເປົ້າໝາຍທີ່ເຫັນວ່າເປັນໂຕຟານແທ້ ຍິງໃສ່ຈຳນວນ 01 ນັດ ເຊິ່ງໄລຍະຫ່າງປະມານ 15 ແມັດ ຈາກນັ້ນ,ຈິງຍ່າງຂຶ້ນໄປເບິ່ງ ປະກົດເຫັນແຕ່ຮອຍຕີນຟານແຕ່ບໍ່ເຫັນຮອຍເລືອດ ຕົນເອງໄດ້ຊອກຟານຈົນຮອດເວລາ 04 ໂມງເຊົ້າຂອງມື້ຕໍ່ມາຈິ່ງກໍບໍ່ເຫັນແລ້ວໄດ້ຍ່າງກັບມາບ້ານພ້ອມທັງເອົາປືນແກັບໄປສົ່ງໃຫ້ທ້າວ ວັນ (ຜູ້ເປັນເຈົ້າຂອງປືນ) ມາຮອດວັນທີ 06 ກຸມພາ ປີ 2020 ຈິ່ງໄດ້ຍິນຂ່າວວ່າພົບຊາກສົບຂອງທ້າວ ພອນ ນອນເສຍວິດຢູ່ໃນປ່າຂອບເຂດທີ່ຕົນເອງໄປເລາະຍິງສັດປ່າຄືນນັ້ນ.

ຜ່ານການກວດກາ,ຊັນນະສູດສະຖານທີ່ເກີດເຫດ,ຊາກສົບ,ການໂທດສະກໍາຄືນ,ການເກັບກຳຂໍ້ມູນທີ່ຖືກຕ້ອງຮັດກຸ້ມ ທ້າວ ຮັກ (ຜູ້ຖືກຫາ)ໄດ້ຍອມຮັບສາລະພາບຕໍ່ເຈົ້າໜ້າທີ່ວ່າ: ຕົນເອງເປັນຄົນຍິງແທ້ ຈຶງເຫັນວ່າການກະທຳທີ່ຜິດຕໍ່ປະມວນກົດໝາຍອາຍາ ມາດຕາ 208 ວັກ 1 ແລະ ມາດຕາ 331 ວັກ 1 ;ປະຈຸບັນລາຍຄະດີດັ່ງກ່າວແມ່ນພວມສະຫຼຸບສໍານວນສໍາເນົາກຽມສັ່ງຟ້ອງສານຕັດສິນລົງໂທດຕາມລະບຽບກົດໝາຍຕໍ່ໄປ.

ພາບ-ຂ່າວ: ປກສ ແຂວງອຸດົມໄຊ