28/05/2020

ABClao

ຂ່າວສານເພື່ອສັງຄົມ

ໂຄສົກທຳນຽບປະທານາທິບໍດີຣັດເຊຍ ຕິດໂຄວິດ-19

ສຳນັກຂ່າວຕ່າງປະເທດລາຍງານເມື່ອວັນທີ່ 13 ພຶດສະພາ 2020 ວ່າ ທຳນຽບເຄຣມລິນ (ທຳນຽບປະທານາທິບໍດີຣັດເຊຍ) ເຜີຍແຜ່ຖະແຫຼງການເມື່ອວັນອັງຄານວ່າທ່ານດິມິທຣີ ເປສຄອຟ ໂຄສົກປະຈຳທຳນຽບເຄຣມລິນ ກຳລັງປິ່ນປົວຢູ່ທີ່ໂຮງຫມໍແຫ່ງຫນື່ງໃນນະຄອນມອສໂກ ເນື່ອງຈາກຕິດເຊື້ອໄວຣັດໂຄໂຣນາສາຍພັນໃຫ່ມ ຫລືໂຄວິດ-19

ດ້ານສຳນັກຂ່າວທາສຊື່ງເປັນກະບອກສຽງຂອງລັດຖະບານຣັດເຊຍລາຍງານເພີ່ມເຕີມວ່າທ່ານເປສຄອຟຄືເປັນເຈົ້າຫນ້າທີ່ລະດັບສູງຄົນທີ່ 5 ໃນລັດຖະບານຣັດເຊຍທີ່ຕິດເຊື້ອ ໂດຍຄົນທຳອິດຄືນາຍົກລັດຖະມົນຕີມິຄາອິລ ມິຊຸສຕິນ ຕາມດ້ວຍທ່ານ ວາລາດິເມຍ ຍາຄູເຊຟ ລັດຖະມົນຕີກະຊວງກິດຈະການຜັງເມືອງ ແລະການກໍ່ສ້າງ ທ່ານນາງໂອລກາ ລິວບິໂມວາ ລັດຖະມົນຕີກະຊວງວັດທະນະທຳ ແລະທ່ານເຊີເກ ຄິຣິເຢນໂກ ຮອງປະທານຄະນະເຈົ້າຫນ້າທີ່ປະຈຳທຳນຽບປະທານາທິບໍດີຣັດເຊຍ

ທັງນີ້ ທ່ານເປສຄອຟຢືນຢັນດ້ວຍວ່າ ທ່ານບໍ່ໄດ້ເວົ້າແບບຕົວຕໍ່ຕົວກັບປະທານາທິບໍດີວາລາດິເມຍ ປູຕິນ ເປັນເວລາດົນກວ່າ 1 ເດືອນແລ້ວ ຂະນະທີ່ຕອນນີ້ຜູ້ນຳຣັດເຊຍພັກຢູ່ທີ່ເຮືອນຮັບຮອງປະຈຳຕຳແຫນ່ງ ໃນເຂດຊານນະຄອນມອສໂກ ໂດຍນອກຈາກມາດຕະການຮັກສາຄວາມປອດໄພທີ່ເຂັ້ມງວດສູງສຸດແລ້ວມາດຕະການດູແລດ້ານສຸຂະພາບຂອງປູຕິນ ເປັນໄປຢ່າງເຄັ່ງຄັດ

ຢ່າງໃດກໍ່ຕາມ ໃນວັນດຽວກັບທີ່ທ່ານເປສຄອຟຢືນຢັນວ່າຕົນເອງກຳລັງປິ່ນປົວອາການຈາກໂລກໂຄວິດ-19 ຜູ້ນຳຣັດເຊຍຜ່ອນຄາຍມາດຕະການລ໊ອກດາວທີ່ເປັນຄຳສັ່ງຈາກລັດຖະບານກາງຫລັງບັງຄັບໃຊ້ຕັ້ງແຕ່ທ້າຍເດືອນມີນາທີ່ຜ່ານມາ ແຕ່ນະຄອນມອສໂກ ແລະເມືອງເຊນປີເຕີສະເບິຣກຊື່ງເປັນເມືອງໃຫ່ຍອັນດັບ 1 ແລະ 2 ຂອງປະເທດ ຕໍ່ເວລາການໃຊ້ຄຳສັ່ງລ໊ອກດາວຢ່າງເຂັ້ມງວດຈົນເຖິງທ້າຍເດືອນນີ້ ພ້ອມທັງເພີ່ມຄຳສັ່ງໃຫ້ປະຊາຊົນໃນພື້ນທີ່ຕ້ອງໃສ່ຫນ້າກາກອານາໄມຫລືຫນ້າກາກຜ້າ ພ້ອມການໃສ່ຖົງມືເມື່ອຢູ່ໃນສະຖານທີ່ສາທາລະນະດ້ວຍ