28/05/2020

ABClao

ຂ່າວສານເພື່ອສັງຄົມ

ຜູ້ເສຍຊີວິດຈາກໄວຣັດໂຄວິດໃນອາເມຣິກາ ທະລຸ 70,000 ລາຍ

ເວັບໄຊສູນຂໍ້ມູນໄວຣັດໂຄໂຣນາ ຂອງມະຫາວິທະຍາໄລ ຈອນ ຮ໊ອບກິນສ ລະບຸວ່າ ຈຳນວນຜູ້ເສຍຊີວິດຈາກໄວຣັດໂຄວິດ-19 ໃນອາເມຣິກາ ເພີ່ມຂື້ນເປັນ 70,115 ລາຍແລ້ວ ຫລັງອັບເດດສະຖິຕິ ເວລາ 00:32 ໂມງ ວັນພຸດທີ່ 6 ພຶດສະພາ 2020 ຕາມເວລາໃນບ້ານເຮົາ ຂະນະທີ່ຍອດຜູ້ຕິດເຊື້ອສະສົມຢູ່ທີ່ 1,192,119 ຄົນ ສູງເປັນອັນດັບ 1 ຂອງໂລກ

ສະຖິຕິລ່າສຸດຂອງອາເມຣິກາເກີດຂື້ນຫລັງຈາກມະຫາວິທະຍາໄລວໍຊິງຕັນ ເຜີຍໂມເດລຄາດການແນວໂນ້ມການລະບາດຂອງໄວຣັດໂຄວິດ-19 ໂດຍລະບຸວ່າ ຈຳນວນຜູ້ເສຍຊີວິດໃນອາເມຣິກາອາດເພີ່ມເກືອບ 2 ເທົ່າໄປຢູ່ທີ່ 134,000 ລາຍ ໃນວັນທີ່ 4 ສິງຫາ ເພາະມີການເດີນທາງຫລາຍຂື້ນ ອັນເປັນຜົນຈາກການຜ່ອນຜັນລ໊ອກດາວທີ່ຄາດວ່າຈະເກີດຂື້ນໃນ 31 ລັດພາຍໃນ 11 ພຶດສະພານີ້

ອີກດ້ານຫນື່ງ ກະຊວງການຕ່າງປະເທດແຫ່ງອັງກິດ ເປີດເຜີຍໃນວັນອັງຄານທີ່ 5 ພຶດສະພາວ່າ ຈຳນວນຜູ້ເສຍຊີວິດຈາກໄວຣັດໂຄວິດ-19 ໃນປະເທດເພີ່ມຂື້ນເປັນ 29,427 ລາຍແລ້ວ ເຮັດໃຫ້ອັງກິດ ກາຍເປັນປະເທດທີ່ມີຜູ້ເສຍຊີວິດຈາກໄວຣັດໂຄວິດ-19 ສູງເປັນອັນດັບ 1 ຂອງທະວີບຢູໂຣບ ແຊງຫນ້າອະຕາລີຊື່ງລາຍງານຜູ້ເສຍຊີວິດຫລ້າສຸດທີ່ 29,315 ລາຍ  ທັງນີ້ ອິຕາລີເຄີຍເປັນປະເທດໄວຣັດໂຄວິດ-19 ລະບາດຫນັກທີ່ສຸດໃນໂລກຢູ່ຊ່ວງຫນື່ງ ແລະເປັນປະເທດທຳອິດໃນຢູໂຣບທີ່ໃຊ້ມາດຕະການລ໊ອກດາວຢ່າງເຂັ້ມງວດເພື່ອຄວບຄຸມໄວຣັດແຕ່ໃນປະຈຸບັນ ອັດຕາພົບຜູ້ຕິດເຊື້ອລາຍວັນໃນປະເທດຫລຸດລົງຢ່າງຫລາຍ ເຮັດໃຫ້ເລີ່ມຜ່ອນຜັນມາດຕະການລ໊ອກດາວລົງ ໂດຍໃນອາທິດນີ້ປະຊາຊົນປະມານ 4 ລ້ານຄົນສາມາດກັບໄປເຮັດວຽກໄດ້ແລ້ວ ນອກຈາກນີ້ ຈຳນວນຜູ້ຕິດເຊື້ອຄົງເຫລືອໃນອິຕາລີຫລຸດລົງຢ່າງຕໍ່ເນື່ອງໄປຢູ່ທີ່ 98,467 ລາຍ