28/05/2020

ABClao

ຂ່າວສານເພື່ອສັງຄົມ

ຜູ້ນຳເວເນຊຸເອລາ ຖະແຫຼງຈັບທະຫານຮັບຈ້າງຊາວອາເມຣິກາ 2 ຄົນ

ສຳນັກຂ່າວຕ່າງປະເທດລາຍງານວ່າປະທານາທິບໍດີ ນິໂຄລັສ ມາດູໂຣ ແຫ່ງປະເທດເວເນຊຸເອລາ ຖະແຫຼງສົດຜ່ານໂທສະພາບໃນວັນຈັນທີ່ 4 ພຶດສະພາ 2020 ວ່າທາງການສະມາດຈັບກຸມຜູ້ຕ້ອງສົງໄສ 13 ຄົນ ລວມທັງຊາວອາເມຣິກາ 2 ຄົນທີ່ທ່ານອ້າງວ່າເປັນທະຫານຮັບຈ້າງ ຊື່ງພະຍາຍາມລັກເຂົ້າມາໃນປະເທດຜ່ານທາງຊາຍຝັ່ງທະເລແຄຣິບບຽນ ເພື່ອໂຄ່ນລົ້ມຕົນ


ທ່ານມາດູໂຣ ກ່າວວ່າ ຄົນກຸ່ມນີ້ກ່ຽວຂ້ອງກັບກຸ່ມຄົນທີ່ພະຍາຍາມໃຊ້ເຮືອໄວລັກລອບເຂົ້າມາຈາກໂຄລອມເບຍເມື່ອວັນອາທິດທີ່ຜ່ານມາ ແຕ່ຖືກເຈົ້າຫນ້າທີ່ຄວາມຫມັ້ນຄົງປາບປາມໄດ້ເສຍກ່ອນ ເຮັດໃຫ້ຄົນຮ້າຍເສຍຊີວິດ 8 ຄົນ


ທ່ານມາດູໂຣ ຍັງສະແດງຫນັງສືເດີນທາງ ແລະບັດປະຊາຊົນຂອງຊາວອາເມຣິກາທັງ 2 ຄົນຊື່ງລະບຸວ່າເປັນຂອງ ໄອຣານ ແບຣຣີ ແລະ ລຸຄ ເດັນແມນ ໂດຍເຮັດວຽກຮ່ວມກັບ ຈໍແດນ ໂກໂດຣ ອະດີດທະຫານຫນ່ວຍກຣີນເບີເຣຕ ຂອງອາເມຣິກາ ເຈົ້າຂອງບໍລິສັດຮັກສາຄວາມປອດໄພ ຊິລເວີຄອບ ຢູເອສເອ (Silvercorp USA) ຊື່ງມີສຳນັກງານໃນລັດຟໍຣິດາ
ທັງນີ້ ລັດຖະບານເວເນຊຸເອລາເຜີຍວ່າ ເມື່ອວັນອາທິດ ກຸ່ມທະຫານຮັບຈ້າງກໍ່ການຮ້າຍ ເດີນທາງອອກຈາກໂຄລອມເບຍມາຂື້ນຝັ່ງທີ່ເມືອງມາຄູໂຕ ຊື່ງຫ່າງຈາກນະຄອນກາຣາກັສ ໄປທາງເຫນືອປະມານ 34 ກິໂລແມັດ ກ່ອນຈະຖືກເຈົ້າຫນ້າທີ່ຄວາມຫມັ້ນຄົງເຂົ້າສະກັດ ແລະເກີດການປະທະຈົນມີຜູ້ເສຍຊີວິດດັ່ງກ່າວ


ທ່ານໂກໂດຣໂພສຄລິບວິດີໂອອ້າງຕົວວ່າຢູ່ເບື້ອງຫລັງການບຸກຮຸກເມື່ອວັນອາທິດ ແລະບອກກັບສຳນັກຂ່າວຮອຍເຕີວ່າ ທ່ານແບຣຣີ ແລະທ່ານເດັນແມນ ກໍ່ມີສ່ວນຮ່ວມດ້ວຍ ຂະນະທີ່ກະຊວງຕ່າງປະເທດອາເມຣິກາ ຍັງບໍ່ອອກມາສະແດງຄວາມເຫັນໃດໆກ່ຽວກັບເລື່ອງການຈັບໂຕຊາວອາເມຣິກາ ແຕ່ປະຕິເສດຄວາມກ່ຽວຂ້ອງກັບການບຸກຮຸກໃດໆ ທີ່ເກີດຂື້ນໃນເວເນຊຸເອລາ