28/05/2020

ABClao

ຂ່າວສານເພື່ອສັງຄົມ

ອົງການອານາໄມໂລກ ຢືນຢັນໄວຣັດໂຄວິດ-19 ເກີດຂື້ນຕາມທຳມະຊາດ

ສຳນັກຂ່າວຕ່າງປະເທດລາຍງານ ເມື່ອວັນທີ່ 2 ພຶດສະພາ 2020 ວ່າທ່ານ ໄມເຄິລ ໄຣອັນ ປະທານໂຄງກາກສຸກເສີນດ້ານສາທາລະນະສຸກຂອງອົງການອານາໄມໂລກ (ດັບເບິລຢູເອຊໂອ) ກ່າວໃນຊ່ວງຫນື່ງຂອງການຖະແຫຼງເມື່ອວັນສຸກວ່າດັບເບິລຢູເອຊໂອກວດສອບຮ່ວມກັບຜູ້ຊ່ຽວຊານຈາກຫລາຍຂະແຫນງຊ້ຳແລ້ວຊ້ຳອີກ ແລະໄດ້ຂໍ້ສະຫລຸບທີ່ເປັນການຢືນຢັນກົງກັນວ່າເຊື້ອໄວຣັດໂຄໂຣນາສາຍພັນໃຫ່ມ ຫລືໂຄວິດ-19 ເກີດຂື້ນຕາມທຳມະຊາດ

ຂະນະດຽວກັນ ດັບເບິລຢູເອຊໂອກຳລັງສຶກສາຢ່າງລະອຽດວ່າເຊື້ອພະຍາດດັງກ່າວສາມາດກ້າວຂ້າມ ກຳແພງທາງສາຍພັນ ລະຫວ່າງມະນຸດກັບສັດໄດ້ແນວໃດ ເພື່ອຍົກລະດັບຄວາມຮູ້ແລະຄວາມເຂົ້າໃຈໃຫ້ກັບທຸກຝ່າຍ ຕະຫລອດຈົນເພື່ອການຈັດເຮັດແນວທາງປະຕິບັດຢ່າງມີປະສິດທິພາບເພື່ອປ້ອງກັນອາການເຈັບປ່ວຍຊື່ງເກີດຈາກເຊື້ອພະຍາດຊະນິດນີ້ຕໍ່ໄປ
ທັງນີ້ ໃນວັນດຽວກັນດັບເບິລຢູເອຊໂອຍັງມີຖະແຫຼງການ ສະແດງຄວາມຫວັງ ວ່າຈະໄດ້ຮັບເຊີນຈາກລັດຖະບານຈີນ ໃຫ້ເຂົ້າຮ່ວມການກວດສອບຫາຕົ້ນຕໍຂອງສັດຊື່ງອາດເປັນພາຫະນະນຳເຊື້ອໄວຣັດໂຄວິດ-19 ທີ່ສົ່ງຜົນໃຫ້ຊາວໂລກເຈັບປ່ວຍສະສົມຫລາຍກວ່າ 3.4 ລ້ານຄົນ ແລະເສຍຊີວິດແລ້ວເກືອບ 240,000 ຄົນ

ນອກຈາກນີ້ ທ່ານ ໄຣອັນຍັງກ່າວເຖິງການທີ່ນານາປະເທດຜ່ອນຄາຍມາດຕະການລ໊ອກດາວຫລາຍຂື້ນ ວ່າຕ້ອງເປັນການດຳເນີນການຢ່າງຄ່ອຍເປັນຄ່ອຍໄປ ແລະຕ້ອງມີມາດຕະການຮອງຮັບທຸກຂັ້ນຕອນຂອງການຫລຸດລະດັບ ໂດຍສະເພາະການເພີ່ມການສອດສ່ອງດູແລ ກຸ່ມສ່ຽງ ເຊັ່ນແຮງງານຕ່າງໆຊື່ງອາໄສຢູ່ຮ່ວມກັນຢ່າງແອອັດ ເຊັ່ນດຽວກັບນັກໂທດໃນຄຸກ ແລະຜູ້ສູງອາຍຸ ຂະນະທີ່ມາດຕະການເວັ້ນໄລຍະຫ່າງທາງກາຍະພາບ ແລະສັງຄົມຕ້ອງດຳເນີນຕໍ່ໄປ ຄວບຄູ່ໄປກັບການຮັກສາຄວາມສະອາດການກວດຄັດກອງພະຍາດ ແລະການຕິດຕາມບຸກຄົນໃກ້ຊິດກັບຜູ້ຕິດເຊື້ອ ແລະຜູ້ທີ່ມີອາການຕ້ອງສົງໄສ