28/05/2020

ABClao

ຂ່າວສານເພື່ອສັງຄົມ

ຫນ່ວຍສືບຂ່າວລັບອາເມຣິກາຊີ້ ໄວຣັດໂຄວິດ-19 ບໍ່ແມ່ນມະນຸດສ້າງຂື້ນ

ສຳນັກຂ່າວຕ່າງປະເທດລາຍງານເມື່ອວັນທີ 30 ເມສາ 2020 ວ່າ ປະທານາທິບໍດີໂດນັລ ທຣັມກ່າວເມື່ອວັນພະຫັດ ຢືນຢັນຄວາມເຊື່ອຫມັ້ນຂອງຕົນເອງວ່າເຊື້ອໄວຣັດໂຄວິດ-19 ທີ່ກຳລັງແຜ່ລະບາດໄປທົ່ວໂລກຂະນະນີ້ ມາຈາກຫ້ອງທົດລອງດ້ານໄວຣັດວິທະຍາໃນເມືອງອູ່ຮັ່ນຂອງຈີນ

ແຕ່ເມື່ອນັກຂ່າວຖາມວ່າເຫດໃດທ່ານຈຶ່ງເຊື່ອຫມັ້ນຂະຫນາດນັ້ນ ແລະມີຫລັກຖານຫລືບໍ່ ທຣັມຕອບວ່າ ມີ ແຕ່ບອກບໍ່ໄດ້ ແລະກ່າວຕໍ່ໄປວ່າຕົນກຳລັງພິຈາລະນາໃຊ້ມາດຕະການກຳແພງພາສີຮອບໃຫ່ມກັບຈີນເພື່ອຕອບໂຕ້ສະຖານະການທີ່ເກີດຂື້ນ ທັງນີ້ຜູ້ນຳອາເມຣິກາກ່າວເມື່ອຕົ້ນອາທິດນີ້ ເຊື່ອມໂຍງວິກິດພະຍາດລະບາດຄັ້ງນີ້ກັບການເລືອກຕັ້ງປະທານາທິບໍດີອາເມຣິກາທີ່ຈະມີຂື້ນໃນເດືອນພະຈິກນີ້ວ່າ ເປັນຄວາມພະຍາຍາມຂອງຈີນທີ່ຕ້ອງການໃຫ້ສະກັດຕົນອອກຈາກເສັ້ນທາງການເປັນຜູ້ນຳສະໄຫມທີ 2 ຕໍ່ມາກະຊວງການຕ່າງປະເທດຈີນອອກຖະແຫລງການກ່າວວ່າ ເປັນເລື່ອງໄຮ້ສາລະ

 

ຢ່າງໃດກໍ່ຕາມສະຖາບັນໄວຣັດວິທະຍາແຫ່ງເມືອງອູ່ຮັ່ນອອກມາປະຕິເສດຫລາຍຄັ້ງກ່ຽວກັບຂໍ້ກ່າວຫາຂອງຫລາຍຝ່າຍໂດຍສະເພາະຈາກປະເທດຕາເວັນຕົກ ວ່າຫ້ອງປະຕິບັດການໄວຣັດເມືອງອູ່ຮັ່ນຄືຕົ້ນກຳເນີດຂອງເຊື້ອໄວຣັດໂຄໂຣນາສາຍພັນໃຫ່ມ ແລະເປັນແຫລ່ງປ່ອຍເຊື້ອພະຍາດ

 

ດ້ານທ່ານໄມຄ ພອມແພວ ລັດຖະມົນຕີວ່າການກະຊວງການຕ່າງປະເທດອາເມຣິກາກ່າວວ່າ ຍັງບໍ່ມີໃຜຮູ້ ວ່າເຊື້ອໄວຣັດໂຄໂຣນາສາຍພັນໃຫ່ມ (ໂຄວິດ-19) ເກີດຂື້ນທີ່ຫ້ອງທົດລອງໃນເມືອງອູ່ຮັ່ນແທ້ຫລືບໍ່ ດ້ານສຳນັກຂ່າວກອງແຫ່ງຊາດອາເມຣິກາ ຊຶ່ງເປັນຕົ້ນສັງກັດຂອງຫນ່ວຍຂ່າວກອງ 16 ແຫ່ງລວມເຖິງສຳນັກຂ່າວກອງກາງ (ຊີໄອເອ) ອອກຖະແຫລງການວ່າປະຊາຄົມຂ່າວກອງມີຄວາມເຫັນເປັນເອກະພາບກັນ ຕາມການວິເຄາະບົນພື້ນຖານທາງວິທະຍາສາດ ວ່າເຊື້ອໄວຣັດໂຄວິດ-19 ບໍ່ແມ່ນສິ່ງທີ່ມະນຸດສ້າງຂື້ນ ຫລືເປັນການຕັດຕໍ່ທາງພັນທຸກຳ ແຕ່ຈະກວດສອບຕໍ່ໄປວ່າເຊື້ອມາຈາກສັດ ຫລືມີຄວາມເຊື່ອມໂຍງກັບຫ້ອງທົດລອງໃນຈີນຫລືບໍ່