ອາເມຣິກາມີຜູ້ເສຍຊີວິດຈາກໂຄວິດ-19 ທະລຸ 1 ແສນຄົນ

ສຳນັກຂ່າວຕ່າງປະເທດລາຍງານ ເມື່ອວັນທີ 27 ພຶດສະພາ 2020 ວ່າ ກະຊວງສາທາລະນະສຸກຂອງອາເມຣິກາເຜີຍວ່າ ຍອດຜູ້ເສຍຊີວິດຈາກໄວຣັດໂຄໂຣນາສາຍພັນໃຫ່ມ ຫລື ໂຄວິດ-19 ຫລ້າສຸດເພີ່ມຂື້ນທະລຸຫລັກແສນຄົນ ຢູ່ທີ່ 100,572 ລາຍແລ້ວ ຂະນະທີ່ຍອດຜູ້ຕິດເຊື້ອຫລ້າສຸດຢູ່ທີ່ 1,725,275 ລາຍ ຊື່ງຍັງຄົງຄອງອັນດັບປະເທດທີ່ມີຜູ້ຕິດເຊື້ອ ແລະເສຍຊີວິດຫລາຍທີ່ສຸດເປັນອັນດັບຫນື່ືງຂອງໂລກ

ຕົວເລກດັງກ່າວສະແດງໃຫ້ເຫັນຊັດເຈນວ່າ ມີຄົນອາເມຣິກາຈຳນວນຫລາຍເສຍຊີວິດຈາກໄວຣັດມໍລະນະຊະນິດນີ້ ຫລາຍກວ່າຈຳນວນຜູ້ເສຍຊີວິດຈາກສົງຄາມຫວຽດນາມ ແລະເກົາຫຼີລວມກັນ ຂະນະດຽວກັນ ຕາມຂໍ້ມູນຈາກເວັບໄຊ ສູນຂໍ້ມູນໄວຣັດໂຄໂຣນາ ຂອງມະຫາວິທະຍາໄລຈອນ ຮ໊ອບກິນສ ລະບຸວ່າ ມີຜູ້ຕິດເຊື້ອໄວຣັດສາຍພັນໃຫ່ມສະສົມຈາກທົ່ວໂລກຢູ່ທີ່ 5,684,684 ລາຍແລ້ວ ແລະມີຜູ້ເສຍຊີວິດກວ່າ 346,000 ລາຍ

ຢ່າງໃດກໍ່ຕາມ ກ່ອນຫນ້ານີ້ ທ່ານໂດນັລ ທຣັມ ປະທານາທິບໍດີແຫ່ງອາເມຣິກາ ໄດ້ອອກມາດຕະການເພື່ອຢັບຢັ້ງ ແລະຄວບຄຸມການລະບາດຂອງໄວຣັດຊະນິດນີ້ ແລະຄາດການວ່າປະເທດຈະບໍ່ຕ້ອງມີຜູ້ເສຍຊີວິດຫລາຍເຖິງຂະຫນາດນີ້ ຂະນະດຽວກັນ ເມື່ອຕົ້ນເດືອນມີນາທີ່ຜ່ານມາ ຜູ້ຊ່ຽວຊານດ້ານພະຍາດຕິດຕໍ່ຂອງອາເມຣິກາ ເຄີຍເຕືອນວ່າ ເຊື້ອໂຄວິດ-19 ຈະລະບາດຮຸນແຮງເຖິງຂັ້ນຂ້າຊີວິດຊາວອາເມຣິກາໄດ້ຫລາຍກວ່າ 100,000 ຄົນ